පොදුජන පෙරමුණ පක්ෂයට සහයෝගය දක්වන මුස්ලිම් පක්ෂයන් ඒකාබද්ධව කටයුතු

පොදුජන පෙරමුණ පක්ෂයට සහයෝගය දක්වන මුස්ලිම් පක්ෂයන් ඒකාබද්ධව කටයුතු කිරීමෙන් මුස්ලිම් සමාජයට යහපත් සේවාවක් ලබාගැනීමට හැකිවනවා පමණක් නොව, එළැඹෙන මැතිවරණයන් හි පොදුජන පෙරමුණ පක්ෂය වෙනුවෙන් මුස්ලිම් ඡන්ද වැඩිකරගැනීමට හැකිවන බවටත් උලමා පක්ෂය අවධාරණය කරයි.

මේ සම්බන්ධයෙන් එම පක්ෂයේ නායක මුබාරක් අබ්දුල් මජීද් මවුලවි තුමන් තවදුරටත් අදහස් දැක්වීමේදී,

ශ්‍රී ලංකා පොදුජන පෙරමුණ පක්ෂයට සහයෝගය දක්වන මුස්ලිම් පක්ෂයන් හා පොදුජන මුස්ලිම් පෙරමුණ ඒකාබද්ධව ප්‍රචාරක කටයුතුවල නියැළිය යුතු බවට අප විසින් මැතිවරණ සමයේදී  ද ආරාධනා කරන ලදී. එහෙත් අපගේ ආරාධනාව පිළිගනු ලැබුවේ නැත. සියල්ලන්ම වෙන්වෙන්ව තනිතනියෙන් කටයුතු කරන ලදී. නෙළුම් පොහොට්ටුවට මුස්ලිම් ඡන්ද අඩුවීමට මෙයද ප්‍රධානතම හේතුවකි. සජිත් ප්‍රේමදාසට සහයෝගය දැක්වු මුස්ලිම් පක්ෂයන් ඒකාබද්ධව වේදිකාවේ පෙනී සිටීම මුස්ලිම්වරුන් තුල ප්‍රසාදයකට ලක්විණි.

වත්මන් වාතාවරණය තුළ ජනාධිපති ගෝඨාභය මැතිදුන් හා අගමැති මහින්ද රාජපක්ෂ මැතිදුන්ගේ නායකත්වයෙන් යුත් රජයේ ප්‍රබල මුස්ලිම් චරිත ඉතා අල්පයකි. එම හේතුවෙන් මුස්ලිම්වරුන් හට ලැබිය යුතු වරප්‍රසාදවල යම් අඩුපාඩුවක් සිදුවිය හැකිය. එය අනාගතයේදී ද අහිතකර බලපෑමක් ඇතිකරමින් පොහොට්ටු පක්ෂයට සම්බන්ධ මුස්ලිම් පක්ෂයන් කෙරෙහි මුස්ලිම් සමාජය තුළ අප්‍රසාදයක් ඇතිකරමින්,   මුස්ලිම්වරුන් විසින් විරුද්ධ පක්ෂයේ මුස්ලිම් පක්ෂවලට ඡන්දය ලබාදීමට පොළඹවනු ඇත.

වත්මනෙහි පොදුජන පෙරමුණ පක්ෂය පාලන බලය හොබවන බැවින් එයට සම්බන්ධ මුස්ලිම් පක්ෂයන් හරහා තම වරප්‍රසාද ලබාගැනීමට ජනතාව පෙළෙඹවීම සාධාරණය. එය නොලැබුණුවිට හිටපු අය හොදයැයි ඔවුන් තුළ අදහසක් මෝදුවීම වැළැක්විය නොහැකිය. එබැවින් පොදුජන පෙරමුණට සම්බන්ධ මුස්ලිම් පක්ෂයන් පෙරමුණක් වශයෙන් ඒකාබද්ධව කටයුතු කිරීමට උලමා පක්ෂය විසින් ආරාධනා කරනු ලැඛේ. පොදුජන පෙරමුණ සහයෝගිතා මුස්ලිම් පක්ෂ සංධානය ලෙසින් කටයුතු කිරීමෙන් මුස්ලිම් සමාජය මුහුණපාන ප්‍රශ්ණයන් එකිනෙක අධ්‍යයනය කොට රජයේ අවධානයට යොමුකොට ඒවාට විසඳුම් ලබාදීමට කටයුතු කළ හැකිය. ඒ වගේම සමාජයට ලැබිය යුතු වරප්‍රසාදයන් ඒකාබද්ධව කටයුතු කිරීම තුළින් පහසුවෙන් ලබාගැනීමට හැකිවනවා මෙන්ම ඒ මගින් ජනාධිපති ගෝඨාභය මැතිඳුන් හා අගමැති මහින්ද මැතිඳුන්ගේ රජය තවදුරටත් ශක්තිමත් කරන්නට හැකිවන බවටත් අවධාරණය කරන්නෙමු.