பஸ் வண்டிகளில் முறைகேடுகள் இடம்பெற்றால்

பண்டிகைக் காலங்களில் பஸ் வண்டிகளில் முறைகேடுகள் இடம்பெற்றால் 1955 க்கு அறிவிக்கவும்

- பயணிகளிடம் போக்குவரத்து ஆணைக்குழு வேண்டுகோள்

( மினுவாங்கொடை நிருபர் )

   நத்தார் மற்றும் புது வருட பண்டிகைக் காலங்களில் தனியார் பஸ் வண்டிகளில்  முறைகேடுகள் ஏதும் ஏற்பட்டால், அவை  தொடர்பாக உடனடியாக  அறிவிக்குமாறு, தேசிய போக்குவரத்து ஆணைக்குழு பயணிகளை அறிவுறுத்தியுள்ளது. 

   அதிக பணம் வசூலிப்பு, மிகுதமாக பயணிகளை ஏற்றுதல், பஸ் பிரயாணச் சீட்டு வழங்காமை மற்றும் குறிப்பிட்ட வீதிகளில் பயணிக்காமல் இடை நடுவில் போக்குவரத்துப் பாதையினை மாற்றுவது உள்ளிட்ட முறைகேடுகள் தொடர்பாக பயணிகள் போக்குவரத்து ஆணைக்குழுவுக்கு அறிவிக்க முடியும் என்றும் கேட்கப்பட்டுள்ளது. 

   பயணிகள் குறித்த முறைகேடுகளை 1955 அல்லது 011 23 33 222 ஆகிய தொலைபேசி இலக்கங்களினூடாக அழைத்து, முறைப்பாடுகளைத் தெரிவிக்க முடியும் என்றும் ஆணைக்குழு குறிப்பிட்டுள்ளது.

   பண்டிகைக் காலங்களில்  ஆணைக்குழுவினால் ஒழுங்கு செய்யப்பட்டுள்ள விசேட பஸ்களில் இடம்பெறும் குறித்த முறைகேடுகளிலிருந்து பயணிகளைப் பாதுகாக்கும் நோக்கில், அவர்களுக்கு மிகச் சிறந்த பயண வசதிகளை ஏற்படுத்திக் கொடுக்கும் முகமாகவே,  இந்நடவடிக்கை எடுக்கப்பட்டிருப்பதாக, ஆணைக்குழுவின் உயர் அதிகாரி ஒருவர் தெரிவித்தார்.