Thursday, March 28, 2019

රාගම හදිසි ප්‍රතිකාර ඒකකය සවස්වරුවේ වසා තබලා.



(මිනුවන්ගොඩ - අයි.ඒ. කාදිර් ඛාන්)

රාගම ශික්ෂණ රෝහලේ හදිසි ප්‍රතිකාර ඒකකය මාස දෙකක් තිස්සේ සවස්වරුවේ වසා තිබෙන බව වාර්තා වේ. මෙම ඒකකය මාස දෙකක් තිස්සේ සවස හතරෙන් පසුව වසා දමා තිබෙන නිසා රෝගි ජීවිත රැසක් අවධානමට වැටී ඇතැයි ද, නිදහස් සෞඛ්‍ය සේවාවක් සදහා ජනතා ව්‍යාපාරයේ කැදවුම්කරු වෛද්‍ය නිලාන් ප්‍රනාන්දු මහතා පැවසීය.
හදිසි ප්‍රතිකාර ඒකකය නව ගොඩනැගිල්ලකට ගෙනයාමෙන් පසුව, ඊට අවශ්‍ය ඉඩකඩ හා කාර්ය මණ්ඩලයක් නොමැතිවීමෙන්, මෙම තත්ත්වය උද්ගතව ඇතැයිද වෛද්‍ය ප්‍රනාන්දු මහතා කීය.
හදිසි ප්‍රතිකාර ඒකකයක් යනු විසි හතර පැයේම සේවාව ලබාදිය යුතු ප්‍රතිකාර ඒකකයක් වුවද, මෙසේ සවස හතරෙන් පසුව එය වසා දැමීම නිසා, හදිසි ප්‍රතිකාර සදහා මෙම රෝහලට ඇතුලත් කරන රෝගින්ට අවශ්‍ය මූලික වෛද්‍ය පරීක්ෂණ නොකරම වාට්ටුවලට යොමුකිරීමට සිදුව ඇතැයිද ඔහු කීය.
මේ තත්ත්වය නිසා, හදවත් රෝගින් වැනි පිරිස්වල ජීවිත දැඩි අවධානමකට හෙලා ඇතැයි වෛද්‍ය ප්‍රනාන්දු මහතා චෝදනා කළේය.
වෛද්‍යවරුන් දොළොස් දෙනෙකුගේ පමණ සේවය අවශ්‍ය වුවත්, රාගම රෝහලේ හදිසි ප්‍රතිකාර ඒකකයේ දැනට සේවය කරන්නේ, තිදෙනෙකු යැයි ද ප්‍රනාන්දු මහතා වැඩිදුරටත් සදහන් කළේය.

No comments:

Post a Comment